✺ મિત્રતા એટલે શુ ?
❍ સાથે હારવુ-સાથે જીતવુ કે ડ્રો થઇ જાય તેવી રમત, તેને જ કદાચ મિત્રતા કહેવાય.
❍ સ્નેહનો સંબંધ જેની સાથે જીવનના દરેક રહસ્યો, લાગણીઓ, અને ઉર્મીઓ, શેર કરી શકાય. મિત્રતા એટલે માત્ર અને માત્ર મૌન અને હ્રદય વચ્ચેનો સેતુ જેને આંધળો જોઇ શકે, બહેરો સાંભળી શકે અને મુંગો બોલી શકે.
❍ મિત્ર એટલે બાળપણમાં સાથે રમેલા હોય તે..,જુવાનીમાં સાથે ભણ્યા હોય તે..,કોલેજમાં ભણતરમાં સાથ આપ્યો હોય તે..,ધંધામાં એક પ્રકારનો વ્યવસાય કરતા હોય તે..,એક જ શોખ ધરાવતા હોય તે..,અકસ્માતે પડી જવાય ને હાથ પકડી ઉભા કરી કહે
‘દોસ્ત સાચવીને ચાલ’ તે...
ફ્રેડશિપ ડે દરેક વર્ષે ઓગસ્ટના પ્રથમરવિવારે ઉજવાય છે. આમ તો દોસ્તી માટે કોઈ દિવસ નક્કી નથી હોતો. સાચા મિત્રો તો સદાય સાથે જ રહે છે. ઋતુ કેવી પણ હોય પણ મિત્ર દરેક ઋતુને સુંદર બનાવી આપે છે. જે જાદૂ મોટાથી મોટા જાદૂગર નથી કરી શકતા એ જાદૂ ફ્રેંડસ કરી આપે છે. દોસ્તને જોતા જ કેટલુ પણ મોટુ દુખ હોય તો પણ ચેહરા પર સ્માઈલ આવી જાય છે. મિત્ર,સખા,દોસ્ત, ફ્રેંડ કોઈ પણ નામે કહો પણ દોસ્તની વ્યાખ્યા કોઈ નહી આપી શકે. મિત્ર જેને સુખ:દુખ બધા પ્રકારની વાત શેયર કરવાનું મન થાય.
હાં ઓગસ્ટનો પ્રથમ રવિવાર મિત્રોનો જ દિવસ છે એટલે કે " ફ્રેડશિપ ડે "
માણસ ને પોતાના જીવનમાં ત્રણ – ચાર થી વધારે મિત્રો હોઇ શકે નહિ. પણ હા… તાળી મિત્રોનો કોઇ તોટો ન હોઇ શકે. પરંતુ કપરા સંજોગોમાં દુ:ખની સ્થિતિમાં જે સાથ આપે તે જ સાચા મિત્રો કહેવાય. મિત્ર એવા હોય જે કોઇ પણ સ્થિતિમાં સાથે જ રહે. એક ગુજરાતી કવિએ કહ્યુ છે. “શેરી મિત્રો સો મળે તાળી મિત્રો અનેક જેને દુ:ખમાં પામીયે તે લાખોમાં એક”. તે પણ એક લાખોમાં મળે તો મળે ન પણ મળે. પોતાના માટે નહિ, બીજા ને માટે મથે. બીજા ને મદદરૂપ થાય. પોતે ઘસાય ને બીજા ને અજવાળે આવો મિત્ર કયારેક જ મળે છે. “ઋગ્વેદ” માં પણ એજ વાત કરી છે. “ન સ સખા યો નદદાતિ સખ્યે” એટલે કે “જે સાથીને સાથ આપતો નથી તે મિત્ર હોતો નથી”. સુખ ના સમયમાં તો ઘણા મિત્રો મળે છે. પરંતુ દુ:ખમાં તેમાથી એક પણ જોવા મળતો નથી. તેને મિત્ર ન કહિ શકાય. ‘રામયણ’ માં પણ વાલ્મીકી એ કહ્યુ છે “મિત્ર દુ:ખમાં હોય કે સુખમાં, તે પોતાના મિત્ર ને સદાય સહાય કરે છે”. એ સહાય માત્ર આર્થિક હોય એવું પણ નથી. મિત્રની બધી જ સ્થિતિમાં સાથ આપે તેને સાચો મિત્ર કહેવાય.
❍ ‘વાલ્મીકી’ એ ‘રામાયણ’ માં કહ્યુ છે કે, “ગરીબ હોય કે તવંગર, દુ:ખમાં હોય કે સુખમાં હોય કે પછે ભલે ને દોષિત હોય. (જેવો હોય તેવો), મિત્ર એ જ પરમ ગતિ છે. એ જ ગતિ મિત્રની પરમ ગતિ પણ બને છે અને અધોગતિ પણ”. સાચો મિત્ર પીઠ પાછળ ઘા ન કરે, એ મિત્ર કયારેય પણ વિશ્વાસઘાત ન કરી શકે.
❍ મિત્ર એટલે પ્રભુના પ્રેમનો પયગંબર, જીવનસૃષ્ટી પર લાગણીસભર અંબર.
❍ શેરીમિત્રો સો મળે, તાળીમિત્ર અનેક, જેમાં સુખ-દુઃખ વામીએ, સો લાખનમાં એક.
❍ જગતનો ઉતમ સંબંધ મિત્રતા છે, જેમા શ્બ્દોની જરૂર નથી હોતી.
❍ આપણી સફળતા જોઇને આપણા કરતાં પણ વધું ખુશ થાય તે મિત્ર.
❍ મિત્ર એક એવું ગુલાબ છે તે તમારા જીવનને પોતાની સુગંધથી ભરી દે છે.
❍ મુશળધાર વરસાદમાં પણ તમારા આંસુને ઓળખી લે તે મિત્ર.
❍ તમારી આંખમાંથી પડતાં આંસુ ઝીલી લે તે મિત્ર.
❍ મિત્ર એટલે જેની પર તમે આંખો બંધ કરીને વિશ્વાસ કરી શકો
તમે જો કયારેય પણ જો આ કાવ્ય સાંભળ્યુ હોય તો, “પાછળ પ્રવાસ માં ઘણા મિત્રો હતા, પણ કોણે કર્યો ઘાવ મને ખબર નથી”. એવા કહેવાતા મિત્રોની તો લંગાર લાગી શકે છે. ભુલ થી પણ તમે સારા ઠેકાણા પર કે સારા હોદા પર હોવ તો, મિત્રોના ટોળેટોળા જામતા હોય છે. પણ તમે એકદમ ઉઘાડા હોવ, કોઇ આધાર ન હોઇ તો કોઇ સામે પણ ન જુએ. પોતાના સ્વાર્થ્ ખાતર જે ગમે તે કરવા તૈયાર થાય એ મિત્રના રૂપમાં એક મહાન શત્રુ હોઇ શકે. વેદવ્યાસે ‘મહાભારત’ માં ‘ઉધોગપર્વ’ માં જણાવ્યુ છે કે “પિતા જેટલો જેના પર વિશ્વાસ કરી શકાય તે જ સાચો મિત્ર હોઇ શકે બાકી બધા તો માત્ર સાથી જ હોઇ છે”. જેના પર કયારેય પણ વિશ્વાસ થઇ જ ન શકે. અરે!!! કોઇ સંજોગોમાં કોઇ પશ્ન ઉભો થાય. છતાંય કોઇની આગળ એક પણ શબ્દ પણ ન બોલે તેને મિત્ર કહેવાય. વેદવ્યાસે ‘રામાયણ’ ના ‘વનપર્વ’ માં કહે છે “સહયાત્રીઓનો સમુહ અથવા તો સાથે યાત્રા કરવા વાળા સાથી જ પ્રવાસી નો મિત્ર છે. પત્ની ગૃહસ્થની મિત્ર છે. વૈદ રોગી નોમિત્ર છે અને દાની મરતાં માણસનો મિત્ર છે”. જેના દ્રારા માણસ મુકિત, આનંદ કે ઉંમગ માણી શકે છે. ઘણા એવા લોકો હોય છે કે જેનો બીજા જોડે કોઇ પરીચય પણ ન હોઇ પણ સંબંધ બાધ્યા પછી તે સંબંધ ને સાચવે કપરામાં કપરા સમયે સાથ આપે છતાંય પણ તે સાચા મિત્ર છે એવી કયાંય પણ ડંફાશો ન મારે. કેટલાક તો એવા હોય છે કે પુરેપુરું નામ પણ ના જાણતા હોઇ છતાં પણ મિત્રતા નિભાવે છે.રામાયણના ‘ઉધોગપર્વ’ માં જ ‘વેદવ્યાસે’ કહ્યુ છે “પહેંલા કોઇ જ સંબંધ ન હોય પણ જે મિત્રતાનો વ્યવહાર કરે એ જ ભાઇ – બહેન, એ જ મિત્ર, એ જ સહારો એ જ આશ્રય છે”.
મિત્ર શોધવામાં જો જો તમે થાપ ન ખાઈ જતાં. ગુજરાતીમાં એક કહેવત છે કે-જો તમને એક સાચો મિત્ર મળી જશે તો પછી તમારે હજારો લાખો સંબંધીઓની પણ જરૂર નથીમિત્ર બનાવવામાં તમે કોઇ કેટેગરી પસંદ ન કરી શકો કે હુ અમીર છું તો મારે અમીર મિત્ર જ જોઇએ. બની શકે કે ઘણી વખત અમીર મિત્રો જે કામમાં ન આવે તેના કરતાં વધું ગરીબ મિત્ર કામમાં આવે. પણ હા અહીં વાત અમીર અને ગરીબની નથી થતી અહીં વાત થાય છે મિત્રતાની એક સાચા મિત્રની.આજે ભલે સાચી મિત્રતા ખોવાઇ ગઈ હોય પરંતુ યુવાનો ફ્રેંન્ડશીપ ડે ની જે ખુબ જ ઉત્સાહ પૂર્વક ઉજવણી કરે છે તે પણ કાંઈ ઓછું નથી તે બહાને તેઓને મિત્રતાની કિંમત તો સમજાય છે અને કદાચ ઘણા લોકો તો એવા પણ હશે કે તેઓના મિત્રને ફ્ક્ત ફ્રેંન્ડશીપ ડે ના દિવસે જ યાદ કરતાં હશે. તો તેઓના માટે પણ સારૂ છે કે તેઓ વર્ષમાં એક જ વખત પોતાના મિત્રને યાદ કરે છે.તો આવો આ વર્ષે પણ મિત્રતા દિવસ પર કઈક ખાસ એવું કામ કરીએ આપણા મિત્ર માટે કે જેથી કરીને તેને પણ લોકોને કહેતા ગર્વ થાય કે આ 'મારો' મિત્ર છે અને આખી જીંદગી તે તમને અને આજના દિવસને ભુલી ન શકે.
❍ ‘મહાભારત’ માં ‘દ્રોણપર્વ’ માં કહેવાયું છે કે “સૈન્યનો નાશ થઇ જાય છતાંય, જો સાથ આપે એ જ મિત્ર છે. જ્યાં કોઇ અપેક્ષા ના હોઇ, આશા ન હોઇ છતાંય સાથ-સહકાર આપતો હોય, ખડા પગે હાજરા – હજુર રહે એ તો મિત્રતા છે”.
❍ મિત્રનો અર્થ શું થાય જાણો છો તમે? મિત્ર એટલે--એક સાચો મિત્ર હજારો સંબંધીઓની ગરજ સારે છે
❍ મિત્ર એ જ છે જે તમારા ભૂતકાળને ભૂલી તમને સમજે અને તમે જેવા છો તેવા જ તમને સ્વીકાર કરે.
❍ મિત્રનું સન્માન કરો ,એની પાછળ એની પ્રશંસા કરો અને જરૂર પડ્તા એની મદદ કરો
મિત્રો......,
આટલું જાણયા પછી આપને વિચારવાનું છે. કે તમારે કેવાં મિત્ર બનીને ઇતિહાસમાં નામ નોંધાવું છે. હાં… ઇતિહાસમાં નામ ન નોંધાવો તો કંઇ નહિ પરંતુ એક સાચા મિત્ર બનીને તમારી જાત માટે ગર્વ તો લઇ જ શકો ને!!!! તો હજુ રાહ શેની જોવો છો….. જાવ અને દોસ્તી માટે નવી રાંહ તૈયાર કરો અને હાં……. તે પણ જો ક્યારેય પણ તમે તમારા દોસ્ત થી વિખુટા પડી ગયા હોય તો તે દોસ્ત ને માફ કરી દો અને ફરી થી દોસ્તી માટે નવી મીસાલ તૈયાર કરો.
કારણ કે… દોસ્તી એક એવુ રતન છે જેમની કોંઇ જ કીંમત નથી.
આપના પ્રતિભાવ જરૂરથી આપશો.
